Plantun de Prouvènço

Pèr coumpara dos planto d'encò nostre

Leontodon hirtus & Rosa dumalis

Moulin-de-prat(-agarrussi)

Leontodon hirtus

Asteraceae Compositae

Autre noum : Mounge.

Nom en français : Liondent hérissé.

Descripcioun :
Aquéu moulin-de-prat trachis dins li tepiero umido à bagnado en ivèr. Fai de coulounìo ço qu'es un bon mouien pèr lou destria. Si fueio soun longo de 2 à 8 cm e proun descoupado (fotò). Se recounèis majamen emé si péu que, se sèmblon simple, à la forto lùpi (X 30), soun bifido au bout (fotò). Ansin i'a pas pèr s'engana. Coumpara pamens emé lis àutri moulin-de-prat.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai. Tant se pòu que siegue manjadis emai siegue tant agarrussi.

Port : Erbo
Taio : 5 à 20 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Leontodon
Famiho : Asteraceae
Famiho classico : Compositae
Tribu : Cichorieae

Coulour de la flour : Jauno
Petalo : >6
Ø (o loungour) enflourejado : 2 cm
Flourido : Printèms - Estiéu - Autouno

Sòu : Ca
Autour basso e auto : 0 à 1700 m
Aparado : Noun
Jun à óutobre

Liò : Tepiero umido - Marle - Argielo
Estànci : Subremediterran à Mountagnard
Couroulougi : Estenoumediterranenco-Nord-Ouèst
Ref. sc. : Leontodon hirtus L., 1759

Agufié(-roso)

Rosa dumalis

Rosaceae

Àutri noum : Agoulencié, Agrufié, Agoulancié, Grato-quiéu, Tapo-cuou.

Nom en français : Églantier commun.

Descripcioun :
Aquel agufié, Rosa dumalis, trachis dins li relarg mountagnous e roucaious. Douno d'èr à Rosa canina, mai èi bèn mens coumun. Èi mai rabasset, emé de fueio souvènt verdalo e de flour pus acoulourido, roso vivo. La diferènci founso èi de vèire dóu coustat de l'ourifice calicinau qu'èi mai grand (>1/4 de la larjour, vèire la fotò). Aquel agufié-roso, presenta aqui èi Rosa dumalis s.s. (sènso glando sus lou pecou, dènt di fueioun coumpausado e sènso péu souto li fueio).

Usanço :
Tóuti lis agufié fan de fru (grato-cuou, agoulènço...), riche en vitamino C e anti-enflamatiéu, que soun bon à manja, majamen en counfituro.